آخر نَفَس (عامية)

7:55 ص Edit This 2 Comments »
العيد خلص ..

والكحكه نشفت م الهوي ..

والشاي برد ..

قلت إتفرد فوق السنين

وامضغ شوية ذكريات ..

المشكلة ..

انك بقيت تلاتين سنة ..

والقلب عمره الف عام

زارعين علي عنيك الكآبة والملل ..

تلاتين خلل ..

قلبك ورق

يوم ينطوي ..

يوم ينتني ..

يوم يتحرق ..

والكل بيشخبط

النبض يتلخبط

يعلن تسمم ف البدن

كتر المحن اصبح طريق



لما بدوخ ..

وادخل حيطانه التقي

حبة صور

من علبة الزمن القديم متكونة

ومدونة جواه شعب

انسي التعب

وافضل اغني للصور

للعمر لما ينسرق

ساكناك جبال

ساكناك حفر ..

وايام سفر ..

وذنوب يا ريتها

تتغفر ..
وسكات ماليك..

اكتم سكاتك الا غيرك يسمعه

واللا اخلعه

وارميه بعيد..

المستفيد م القلب راح

سابلك جراح

خلص كتابه وشخبطه

ورماك علي كل الطرق

ماهو اصل قلبك ..

من ورق

موجة (عامية)

8:23 ص Edit This 2 Comments »
انا موجه كانت

ف بحر عاصف مالوش قرار..

والبحر عالي

فوق احتمالي ومفيش قرار..

بحلم بشطي عليه اخطي

والحلم يبعد

والانتظار ..هوه انتظار

........

وفضلت اجري

والعمر يجري والموج ورايا

مليون حكاية

راسمين نهاية مليون هزيمة وانكسار

والقلب يحلم كل لحظة بالنهار

ينهار ويرجع يتبني بعد انهيار

والنور ..بعيد

الخوف يزيد

ع العمر

والامل الوحيد..

يطلع نهار

..........

الموج بيعلي

وانا وسط بحر الخوف

بموت

والليل تابوت

شنقتني لحظات السكوت

بتفوت عليا لحظتي

بحساب سنين


ولا فيش حنين

الجأ اليه

ولا شطي بان

احزان تعشش

جوه قلبي تكسره

واستني شط يضمني

واستني موجه

تشدني لبر الامان

انسان ..

وكل المشكله

مش لاقي جنبي في دنيتي

انسان


دبي/مايو2008

كنا زمان (عامية)

7:05 ص Edit This 0 Comments »
كنا زمان

من كام سنه ..

عايشين ف بيت زي البيوت ..

الشمس تطلع كل يوم وتسيب لنا

قيراطين شعاع

ناخد شعاع الشمس

نغزل بكرة خيط

ننشر خيوطنا فوق سطوح العتمة نور..

تطرح بذور..

نزرع بذور النور

ف أرض الحلم تكبر أمنيات

اوقات نشيلها لنفسنا

واوقات نوزع منها علي روح اللي مات

ونطول شموس

وتبان بيبان بكرة البعيد

والعيد يبان ..

والحب يملا الكون امان ..

كنا ... زمان ..

حلم ميت (عامية)

6:42 ص Edit This 0 Comments »

كان في يوم

وياما كان

كان زمان غيرالزمان

طير صغير ..

ناسي كل الدنيا

واقف

لاجل ريشه يوم ما يكبر

حلمه يكبر ريشه بدري

..كان بيجري

قلبه باصص للسما

وعنيه بتلمع

مر يوم واتنين وعشره

ريشه طال وبدأ يطير

لحظه واحده
طار لفوق

عالي طاير بص تحت

كان مفكر

انه عمره ف يوم ما ينزل

فجأه صابت

بندقيه قلبه ..

غمض

وانتهي حلمه ف ثواني

نفس غصن الشجره


شال جسمه الصغير

بس روحه في السما
.....

مش راجعه تاني


دبي مايو 2008

مشتريكي (عامية)

6:22 ص Edit This 0 Comments »

سافرى فيّه

كسّرى كل حكاياتي

وذكرياتي قبل منك

لوّنى عمري اللي جاى ف حضن قلبك

لون يفرّح ..

كونينى بسمة غايبة

عن شفايف من سنين ..

نجمة طايرة لفوق

وسايبة .. أرض كانت خوف وغيم

طير بيعلى لما بيشوفك

سماه ..

منتهاه أنه يعشش جوّه قلبك

أو يموت وعينه ف حضنك

علمى قلبى يسامحك ..

لونينى لون ملامحك ..

أصلى لامحك من بعيد مرسا لحنينى

ريحينى بين كفوفك

خبى خوفك

والسنين اللى أنت ياما تعبتى فيها

بين ضلوعى ..

من دموعى .. هاغسل الحزن اللى طالك

وأمسح النظرة اللى تايهة ف لون عنيكى

مشتريكى ..

ومش شريكى ف حب قلبك حد تانى

مش أنانى بس أنا أخترتك مكانى

سافرى فيّه ..

غيرّى كل اللى فات ..

ذكريات عدّت عليّه قبل منك

لما جيتى .. بكلمة منك

سبت كل الذكريات

إشارة (فصحي)

6:15 ص Edit This 2 Comments »
في ظلمةِ الليلِ
الطويلِ
تطلعت عينايَ
نحوكِ
أرتجي منكِ
الإشارة
أسكبُ الشوقَ
المؤرقَ في سطوري
أمنعُ القلبَ
انتحاره
وانتظرتكِ
لم أَمَلْ
فلم تجيبي
واستطعتُ برغم صدِّكِ
كلما ينقضُ قلبي
أن أُقيمَ لهُ
جِداره
فاستعيديني
لاني استحقك
عن جداره..

عيناك (فصحي)

6:01 ص Edit This 0 Comments »
عيناكِ..
ملجأيَ الأخيرْ..
أغرقيني فيهما..
لن أستجــــير..
ضيعي عمري
بحبكِ..
أرسلينيَ للقبور..
إنني..
شاهدت عمريَ
في عيونكِ..
إنه..
يومٌ قصيرْ..

آخر مسافة عشق (فصحي)

5:52 ص Edit This 0 Comments »


تجلس وحدك..

تذكر أنك كنت تحب

وكنت تذوب..

كنت تجيب هواك

إذا ما نادى ..

أو تتهادى حين تراك ..

تكتم عنها شوقاً ضمك ..

وهى تعانق فيك النبض الحائر ..

وهى تبادل قلبك شوقاً ثم تسافر ..

تأخذ قلبك ..

يرحلُ

يرحلُ .. حيث تكون ..

تجلس وحدك

تذكر أنك كنت تواجه ..

فى عينها .. ألف سؤال ..

وهى تطالع خلف عيونك ..

ألف إجابة ..

ثم تحاسب صمت عيونك ..

حين تراها ترحل عنك ..

تترك قلبك يغرق فيك ..

يبذر شعراً ..

ينبت حزناً ..

يخنق فيك لحاظ الفرح ..

ويحرق نبضك .. كل مساء

تذكر يوماً كانت فيه .. تحبك حقاً

تبعث فيك رسائل عشق ..

من عينيها ..

تقسم فيه بأنك ..

آخر من ستحبُ ..

وأنك كل الناس لديها ..

تذكر دمعك واستلقاء ..

هواك عليها حين يداعبك الإرهاق..

تذكر كل مسافة عشق ..

فوق سواحل عمرك ..

تضحك ..
تبكى ..

ثم تضيع..

ترسم عبر أنينك جسراً ..

تصل عليه الى عينيها ..

ثم تشكل من عينيها ..

شبه حنين ..

كى يأخذك حنينك ..

يوماً نحو هواها ..

ثم تعود..

تذكر ..
تنسى ..

تضحك ..
تبكى..

ثم تموت..

في ذمة الله (فصحي)

5:45 ص Edit This 0 Comments »
1
أنا في ذمة الله
وأنتم في حدادكم ُ
أحبكمُ
فلا تخشون موتكمُ
ولا تخشون الا الله حين يكون صمتكمُ
فهو يومٌ ولا أكثر
قصيرا كان يومكمُ
2
وحين يكون تأبيني
تعالوا في ثياب بيض
فكل الكون في عيني سوف يكون مسوداً
لعل بياض ملبسكم سيمنحني قليل الضوء كي أبصر..
ولا تبكون حين أموت أرجوكم
فماذا تفعل الدمعات في جسدٍ بلا روحٍ
بلا قلبٍ
بلا أملٍ
3
يموت الناس من خوفٍ
ومن مرضٍ ومن ألم ٍ
ومن حبٍ
ومن حلمٍ
ومن قهرٍ
ومن عجزٍ
ومن سفرٍ
وبعض الناس في زمني
يموت الآن من خبز..
3/4/2008

سكت الكلام (عامية)

5:37 ص Edit This 0 Comments »
1
اه يا بلد .....
الحلم فيها مستحيل ..
والحب فيها مستحيل..
مليون دليل علي حلم مات ..
زمن السكات ..
زمن التمزق والشتات ..
وعيون بتروي أرض عطشانه و
.. موات
..أطفال بتحلم يوم بعيد..
ويلونوا في الحلم
ويغنوا نشيد..
( العيد خلص .. العيد خلص
اتكلموا .. لأ نتخرص
اللي هيتكلم يموت
.. واللي يحاول ..
يتفرس )
2
بسمع حليم:
سكت الكلام ..
والبندقية اتكلمت..
الله عليك يا عندليب..
يا ثورة ماتت
زي ما يموت الغريب ..
البندقية اتكلمت ..
يوم سته ابريل اللي فات..
والحلم مات ..
ولا فيه عزا ....
ولا فيه كفن..
3
سكت الكلام
والليل طويل ..
مش مستحيل
الشمس ترجع يوم تبان..
ولا فيه زمان بيدوم ضباب طول الزمان
مستنيين الشمس بكرة تضمنا ..
مستنيين النور ف يوم يرجع لنا
ويلمنا حضنك يا مصر ..

مشهد معتاد (عامية)

6:11 م Edit This 0 Comments »

المشهد بلسان فتاه فلسطينية عربية

النهارده يوم تلات

يوم جديد والشمس طاله

بابا ماسك الجريده

وماما واقفه تدعي لينا

النهارده يكون امان

شهد بره ويا مريم

ضحكهم سمع قلوبنا

لما جه ياسر صاحبهم

شهد خرجت

وابتدوا يجروا ف عيونا

(لاتباعدوا )

ماما قالت

بس نبرة صوت تخوف

رد ياسر لا تخافوا

مهما نبعد

احنا لسه ف ارضنا

وف ضل بيتنا

كنت واقفه

عيني رايحه وجاية

ناحيتهم وخايفه

جاية من وسط المقابر

من بعيد دورية ظالمة

شفت ضلمة

عز ما كان النهار

والشمس طالعة

شفت ياسر

شال ف ايده ورده بيضا

من جنينة كان زارعها

ابن عمي الشهيد حمزه بايده

جاي بيجري

والعساكر كانوا ناويين يخطفولهم

كام شهيد

او حديد

يتحط ف ايدين اللي يجرؤ

يبتسم لو من بعيد

بس ياسر لسه طفل وما بيعرف

حتي ينطق

غير نشيد

قاللهم ياسر بصوته

امشوا مش عايزينكوا بره

بابا قام يجري عليهم

قاللهم طفل وصغير

قالوا بكرة الطفل يكبر

ينتقم من غير حدود

نزلوا ماسكين القيود

عيني راحت عند امي

شفتها كان صوتها راح

السلاح هوه لغتهم

واحنا ما بايدنا سلاح

كسروا بيتنا الصغير

وانتهي وقت الصباح

غابت الشمس وما عادت

من يوميها للنهارده

لسه شايفه الف ورده

والف ياسر من بعيد

لسه بحلم

ان بكره الشمس ترجع

من جديد

يرجع البيت الصغير

ترجع الضحكة اللي ماتت

واللي راح

راجع اكيد

لحظة ميلاد (عامية)

5:41 م Edit This 0 Comments »
كان ليل طويل
وهموم بلد

كان حزن
طارح للأبد

كان قافل القلب البيبان

وف لحظة بان
نور السما


بعد العما
ورمى اللي كان
تحت الهدد

ايه اللي خلاه اتولد؟

ايه اللي خلا الدنيا نور

وتدور ساعات
كان الصدي
واكل عقارب وقتها

..كان ساب حياته و انتهى

لما اشتهي ايام فرح

وقالت له لأ..

قام انجرح

ودبح مواسم حبه

علي عتب السفر

..................

عدت سنه ..........

ذنبه اتغفر

ولمح عنيها من بعيد وسط الحفر

شدت ايديه

ندهت عليه

قام راح لها

ومشي ف ركابها

ورحلها

كتبت له كلمه

من زمان

مشتاق لها

كتبت (بحبك)

عمره اصبح

ملكها

سافري فيا (عامية )

6:46 م Edit This 2 Comments »
سافرى فيّا

كسّرى كل حكاياتي

وذكرياتي قبل منك

لوّنى عمري اللي جاى ف حضن قلبك

لون يفرّح ..

كونينى بسمة غايبة

عن شفايف من سنين ..

نجمة طايرة لفوق

وسايبة .. أرض كانت خوف وغيم

طير بيعلى لما بيشوفك

سماه ..

منتهاه أنه يعشش جوّه قلبك

أو يموت وعينه ف حضنك

علمى قلبى يسامحك ..

لونينى لون ملامحك ..

أصلى لامحك من بعيد مرسا لحنينى

ريحينى بين كفوفك

خبى خوفك

والسنين اللى أنت ياما تعبتى فيها

بين ضلوعى ..

من دموعى .. هاغسل الحزن اللى طالك

وأمسح النظرة اللى تايهة ف لون عنيكى

مشتريكى ..

ومش شريكى ف حب قلبك حد تانى

مش أنانى بس أنا أخترتك مكانى

سافرى فيّا ..

غيرّى كل اللى فات ..

ذكريات عدّت عليّا قبل منك

لما جيتى .. بكلمة منك
سبت كل الذكريات